Атырау облысында қалыптасқан күрделі жағдай әлі шешілген жоқ. «Ақ Жайық» мемлекеттік табиғи резерваты аумағында өрт, ал Атырау мұнай өңдеу зауытының құбыры және «Kazakhstan Petrochemical Industries Inc» ЖШС құбырынан қара түтін шықты, деп хабарлайды Qonaev.info.
Үш оқиғаның бір сәтте қатар болуы күрделі экологиялық жағдай туғызды. Атырау мұнай өңдеу зауытында жанармай газына сұйықтықтың түсуі салдарынан баяу кокстеу қондырғысындағы П-2 пешінің жану режимі бұзылған.
«Сағат 10:32-де қысқа мерзімді түтіндеу болып, 10:47-де түтін толықтай сөндірілген. Ал сағат 10:59-да «Kazakhstan Petrochemical Industries Inc.» ЖШС полипропилен өндіру бойынша біріктірілген газ-химия кешенінде (IGCC) 220 кВ Л-2025 әуе желісіндегі қысқа тұйықталу салдарынан «KUS» ЖШС-нің ПГТЭС-да генерациялау қондырғыларының авариялық жағдай болды. Нәтижесінде, өндірістің ішінара тоқтап қалуына әкеліп соқтырған электр қуаты үзілді», – деді ҚР Экология және табиғи ресурстар министрлігінің баспасөз қызметі.
Қазіргі уақытта екі кәсіпорынға қатысты тексеруді прокуратураға тіркеу жұмыстары жүргізілуде. Екі факті бойынша мән-жай анықталады.
Батыстағы кәсіпорындардың, әсіресе Атырау мұнай өңдеу зауытының экологиялық көрсеткіштері нашар. Зауыт тарапынан табиғатты қорғау заңнамасын бұзу және газды қолдану жұмысы жүйелі түрде тіркелуде.
«Өткен жылы тиісті заңдылықтарды бұзу бойынша дәлелдерге жүгіне отырып Атырау облыстық экология департаменті Атырау мұнай өңдеу зауытының экологиялық рұқсатын тоқтату туралы материалдарды сотқа жолдаған. Алайда, биыл да сапаның жақсармағанын көріп отырмыз. Осыған байланысты кәсіпорындар экологиялық көрсеткіштерін жақсарту мәселесін бақылауға алып, барлығын тез арада бір ретке келтіруі керек. Осы мәселе бойынша министрлік Атырау мұнай өңдеу зауыты мен KPI-нің бас компаниясы – ҚазМұнайГазға және Самұрық Қазына өндеу хат жолдамақ», – делінген ведомствоның хабарламасында.
