Хиджаб дауы жаңа оқу жылы алдында тұрақты түрде көтеріліп келеді
Үкімет кулуарында Оқу-ағарту министрі Ғани Бейсембаев әлеуметтік желі қолданушысының баласын жекеменшік мектеп хиджабпен қабылдағаны туралы жазбасына пікір білдірді.
«Бізде бәрі заң бойынша регламенттеледі. Сондықтан ол жекеменшік бола ма, мемлекеттік мектеп бола ма, бәрі сол заңға бағынып, соның аясында орындалуы тиіс», - деп жауап берді министр.
БАҚ өкілдері жекеменшік мектептердің оқушыны хиджабпен қабылдауға рұқсаты бар-жоқтығын нақтылап сұрады.
«Барлық мектеп белгіленген заң аясында, белгіленген тәртіп бойынша ұйымдастырылуы керек. Жалпы бізде мониторинг деген бар. Әрбір өңірде білім сапасын қамтамасыз ететін департаменттер бар. Олар барлық өңірдегі сапаның қамтамасыз етілуін қадағалап отырады. Сол кісілерден бізге дабыл түсіп жатса, олар қарап, сол бойынша шешім қабылдайды», - деді ведомство басшысы.
Еске салсақ, осыған дейін Талғат Рысқұлбек қызын хиджабпен оқытпаса, Шешенстанға көшетінін мәлімдеген еді. Кейін ол қызын жекеменшік мектеп қабылдайтынын айтқан.