Бүгінгі күнге дейін 16 желтоқсан – егемендігімізді алған күн ретінде тойланып келді. Биыл Мемлекет басшысы Қасым-Жомарт Тоқаев Тәуелсіздік алған күн мен Республика күнінің ара-жігін ажыратып, 25 қазанды «Республика күні» – ұлттық мереке ретінде бекітті. Ел Президентінің бастамасымен дәл осы күн биылдан бастап ұлттық мереке мәртебесіне ие болды.
1990 жылы 25 қазанда Қазақстанның Мемлекеттік Егемендігі туралы Декларация қабылданып, еліміз Тәуелсіздік алуға алғашқы қадамын жасады. Бұл – тарихи және өте маңызды шешім болды. Осыдан кейін «Республика күні еліміздің мемлекет құру жолындағы тарихи қадамының символы болуы керек» деген ұран пайда болды. Еліміздің тәуелсіздігі шынымен де осы күннен басталады.
«Біз Әділетті Қазақстанды құруға кірістік. Барша қазақстандықтар белсене атсалысқанда ғана осы игі мақсатқа қол жеткізе аламыз. Себебі, мемлекеттің тірегі де, басты байлығы да – азаматтар! Жаңғырған ұлттық мерекемізге орай өңірлерде бірлігіміздің символы – көк байрағымызды көтеруге арналған салтанатты рәсім өтеді. Бұл – ұрпақ санасында отансүйгіштік қасиетті, елдік рух пен ұлттық ұстанымды бекемдей түсетін маңызды шара. Көк туымыз – егемендік, азаттық, бірлік, бейбітшілік сынды ізгі құндылықтарды ұштастыратын қастерлі рәміз. Біз – байрағын биік ұстаған бабалардың ұрпағымыз. Сондықтан ту көтеру рәсімі ұлттық мерекенің маңызын арттырады. Қазақстаннан басқа Отанымыз жоқ. Бағдарымыз – айқын, мақсатымыз – ортақ. Біз тәуелсіздік тұғырын биік ұстап, мемлекеттігімізді нығайта береміз. Өйткені Отанымыз – бір, мемлекетіміз – бір, халқымыз – бір. Ендеше Әділетті Қазақстанды бірге құрайық!» - деді Мемлекет басшысы Қ.К. Тоқаев құттықтау сөзінде.
Айта кетейік, ұлттық мереке - Республика күні қарсаңында «AMANAT» партиясының қоғамдық-саяси өміріне елеулі үлес қосып, атсалысқан партияластарға Партия төрағасы Ерлан Қошановтың атынан Құрмет грамоталары табысталды.
«Әрбір ұлттық мерекенің басты міндеті - ел бірлігін нығайту, мемлекеттің рухани күшін арттыру. Елiмiздiң тәуелсiздiгi шынымен де осы күннен басталады. Марапат алған әріптестерімді шын жүректен құттықтаймын! Республика күні құтты болсын! Егеменді еліміз жасай берсін!», - деді «AMANAT» партиясы қалалық филиалының атқарушы хатшысы Берік Жәкенов салтанатты рәсімде сөйлеген сөзінде.
Болашақта бұл мереке тәуелсіздікті дәріптеп, нығайтуға септігін тигізеді деген сеніміміз мол. 13 жылдан кейін қайта бекітілген Республика күні құтты болсын! Егеменді еліміздің еңсесі биік болғай!
