Облыстық ауруханаға 4 адам жатқызылды
Қостанай қаласында «Амангелді» тұрғын алабы Энергетиков 1 мекенжайындағы құтқару жұмыстары аяқталды.
Естеріңізге сала кетейік, 11 желтоқсанда сағат 12:36-да газ-ауа қоспасы жарылып, бір қабатты ғимарат опырлып түскен еді. Аумағы 280 ш.м. және жану ауданы 5 ш.м. болды.
«Қызыл жалын сағат 13:52-де оқшауланды. Газ баллондарының жарылуы адамға да, оның мүлкіне де үлкен қауіп төндіреді. Кеше болған жарылыс соның дәлелі. Кешегі өрт сөндіру және іздестіру-құтқару жұмыстарына Төтенше жағдай қызметі және жергілікті атқарушы органдарының 263 қызметкері мен 61 техника жұмылдырылды. Сондай-ақ, «ДОС» және «Қызыл жарты ай», «10 Регион» волонтерлік топтары тартылды», - деп хабарлады облыстық ТЖД департаментінің баспасөз қызметі.
Белгілі болғандай, іздестіру жұмыстары барысында 12 адам құтқарылған. Үш адамды аман алып қалу мүмкін болмады. Осы оқиғаға қатысты қылмыстық іс қозғалды.
«Облыстық ауруханаға 4 адам жатқызылды. Қалалық ауруханаға 6 адам орналастырылды. 1 адам өз бетінше медициналық қызметке жүгінді, тағы біреуі ауруханаға жатқызудан бас тартты. Барлық зардап шеккендерге медициналық қызмет толық көлемде көрсетілуде. Қазір Қостанай қаласы Полиция басқармасы ҚР ҚК 292-бабы, 3-бөлігі бойынша сотқа дейінгі тергеуді бастады», - деді ведомствоның баспасөз қызметі.
Алдын ала мәлімет бойынша, жарылыс салдарынан 7 жеңіл және 5 ауыр техника зақымдалды, сонымен қатар іргелес жатқан 12 жеке тұрғын үй бұзылған.