Оның сөзінше, аймақтағы полицейлер әлсізге тізе батырып, қылмысты жасыруды әдетке айналдырған
Мәжіліс депутаты, айтыскер-ақын Ринат Зайытов Қазақстанның күштік құрылымдарының үстінен шағым айтып, Бас прокурорға депутаттық сауал жолдады.
«Қазақстан Республикасы өз билігін күш құрылымдарына пәрменді есірсін деп емес, ескерсін деп береді. Халықты қорласын деп емес, қорғасын деп береді! Сондықтан, бүгінгі шұғыл сауал жолдауымыздың себебі – қарапайым халықтың үнін, мұң-мұқтажын, талап-арызын сіздерге жеткізудің соңғы амалы десек болатын шығар. Өйткені шарасыз халық біздер – депутаттарға соңғы инстация ретінде, басқа органдардан көмек күте алмаған соң ғана жүгінеді», - деді Зайытов.
Оның айтуынша, аймақтағы халықтан түсетін хаттың арасында күштік құрылым өкілдеріне шағым айтатындар көп екен.
«Оларға Алматы, Шымкент, Өскемен, Семей, Жаңаөзен және т.б. қалаларынан келіп түскен бірқатар арызды жатқыза аламыз. Онда Атазаңымызбен бекітілген, адам және адамның өмірі, оның құқықтары мен бостандықтарын қорғау сияқты, айрықша құқыққа ие - күштік құрылым қызметкерлері өздерінің «жедел іздестіру іс-шараларын» жамылып, жеке мақсатта әрекет ететіндері мәлімделуде. Мысалы, Шымкент қаласының тұрғыны, жалғызбасты ана - А.А. Мамаева және оның ұлы алаяққа тап болып, шамамамен 4 млн теңгеден айрылған екен, бұл фактіні анықтап, Шымкент қаласының Еңбекші аудандық полиция басқармасына арызымен жүгінген. Алайда, құқық қорғау органдары қызметкерлерімен таныстығының арқасында, айыпталушының үстінен қозғалған қылмыстық іс белгісіз себептермен бірнеше рет тоқтатылған және жәбірленуші мен оның ұлына ашық түрде қоқан-лоқы көрсетілген», - деді ол.
Оның айтуынша, 2021 жылдың тамызында қозғалған іс бүгінгі таңға дейін сотқа жетпеген екен.
Сондай-ақ Қоғамдық қабылдауға келген Шығыс Қазақстан облысы Өскемен қаласының тұрғыны, өтініш иесі З.А.Тотанованың атынан арыз қалдырып, айтып жеткізген жайт тіптен ойға қонымсыз.
«Оның айтуынша жәбірленушінің өзіне аймақтық күштік құрылым қызметкерлері тірідей мәйіт қаздырып, азап көрсеткен (арыздары қоса беріледі). Осындай істі сотқа дейін жеткізбеу, не тіпті істі қозғамау, билігін асыра пайдалану және тағы да сол сияқты іс-әрекеттер туралы менің осындағы әріптестерім де айта алады. Сондай-ақ, бұл Ішкі істер органдарындағы өз қызметтік мансабын асыра пайдаланып, қыздарды зорлау фактісімен өздері ұсталып отыр. Осы ретте, бұларға сенім қайдан болсын?!», - деді ол.
Зайытов атағандай, құзыретін қылмысты азайту үшін емес, табысын көбейту үшін пайдаланатын қызметкерлерге неге шара қолданбаймыз?
«Осыған орай, құқық қорғау саласындағы жекелеген бассыздықты жою үшін Қазақстан Республикасының Бас прокуратурасы, Ішкі істер министрлігі, Сыбайлас жемқорлыққа қарсы іс-қимыл агенттігі және Ұлттық қауіпсіздік комитеті орталық аппараттарының өкілдерінен Тұрақты әрекет ету тобын құруды, аталған топқа қылмысы дәлелденген күштік құрылым қызметкерлерінің құзыретінде болған істерді қайта қарап, шын кінәлілерді анықтауды ұсынамыз», - деді ол.