Екпе егерден бұрын сынама жасалмаған
Атырауда ем-шара кабинетінде екпе салынған әйел тілге келместен көз жұмды. Дертіне дауа іздеп келіп мерт болған адам өлімінің себебі әзірге белгісіз
КТК телеарнасының хабарлауынша, қайғылы оқиға қаладағы №1 емхананың Авангард ықшамауданындағы бөлімшесінде болған. 51 жастағы науқас таңертең дәрігердің нұсқауымен егу кабинетіне келген. Ондағы мейірбикелер нұсқаулықтағы кавинтон дәрісін еккен. Осы кезде науқас есінен танып құлаған. Дәрігерлер алғашқы медициналық көмек көрсеткенімен, марқұм тіл тартпастан кетіпті.
Емхана басшылары бұл анафилактикалық шок болуы мүмкін дейді. Өйткені екпе саларда алдын ала сынама жасалмапты. Марқұм бұрын-соңды қандай да бір аурумен диспансерлік есепте де болмаған. Тек жақында құлағы ауырып, лор маманына қаралып жүрген. Ондағы дәрігер сурдологқа жіберген. Науқас жеке сурдологқа қаралып, маманның тағайындаған емі бойынша емхананың егу кабинетіне келген екен. Қайғылы оқиғадан кейін марқұмның туыстары жауапты органдарға арызданған.
Қазір Денсаулық сақтау министрлігінің медициналық және фармацевтикалық бақылау комитеті жоспардан тыс тексеру басталғанын айтты.
«Себебін анықтау үшін қазір сот-медициналық сараптама жүргізіліп жатыр. Нақты диагнозы мен өлімнің себебі сол сараптамадан кейін белгілі болады. Бірақ біз алдын ала бұл дәріге анафилактикалық шок деп ойлап отырмыз», - деді №1 емхана өкілі Дина Кемелова.