Шығыс Қазақстан облысы Алтай қаласында жөнделіп жатқан Ленин ескерткіші құлап қалды. Осы сәттің видеосы әлеуметтік желіде тарауда.
Белгілі болғандай, Алтай қаласының орталығында орналасқан Лениннің ескерткішіне қазір жөндеу жұмыстары жүргізіліп жатыр екен. Коммунизм көсемінің мүсінін жергілікті әкімдік бюджет есебінен жөндеуде.
15 тамыз күні жұмыс барысында мердігер компанияның жүк тиегіш көлігі ескерткішті құлатып, қиратып алған.
«Ескерткіштің жөндеу жұмыстары кезінде құлап кетуіне байланысты құқық қорғау органдары тексеру жүргізуде. Оқиғаның барлық мән-жайы содан кейін белгілі болмақ», - деп хабарлады әкімдік өкілдері.
Видео әлеуметтік желіде қызу талқыға түсіп жатыр.
«Сол Алтай қаласында жұмыста жүрмін. Күнде көремін ескерткішін. Отаншыл әкімі жоқ қала екен. Тым болмағанда мына Ленин құлап қалмай ма дейтінмін, орындалды. 4 млн қазақты қырған адамның ескерткішін абайлау керек қой. Қазаққа Ленин керек емес. Сол құлаған қалпы көзін құрту керек. Орнына Абайды қою керек»,- деп жазды олар.
