Кеше елімізде оқу гранттарының иегерлері белгілі болды. Тегін оқып, стипендия алғысы келген 94 мың студент құжат өткізсе, олардың жартысына жуығы мемдекеттік грантты жеңіп алған. Ал, қалғандары ақылы оқуға мәжбүр.
Десе де, бұрырғы Білім министрі, қазіргі Мәжіліс депутаты Асхат Аймағамбетов грант жеңгендер тізіміне іліге алмай қалған түлектерді мойымауға шақырды, олардың әлі де тегін оқуға мүмкіндігі бар екен. Ендеше, ол қандай мүмкіндік және оған кімдер үміт арта алады?
«Біріншіден, игерілмеген бірнеше мың грант қайтадан үлестіріледі. Яғни грант алған талапкерлерден кейін тұрған талапкерлерге ҰБТ-да жинаған ұпай санына сәйкес беріледі. Соны күтуге болады.
Екіншіден, әкімдіктердің гранттары бар. Бірнеше мың грант жергілікті бюджеттен бөлінеді.
Үшіншіден, «Қазақстан халқына» қорының гранттары тағы бар.
Төртіншіден, кейбір талапкерлер түрлі себеп бойынша жеңіп алған гранттарынан бас тартады. Олардың саны да аз болмайды. Ол гранттар да қайта тағайындалады.
Бесіншіден, тіпті ештеңе болмаса, университетке ақылы түрде түсіп, кейін жақсы оқып, GPA жоғары болса, білім алу кезінде босаған бос грантты ұтып алуға болады.
Алтыншыдан, «gap year»алып бір жыл дайындалып қайтадан ҰБТ тапсырып грантты жеңіп алуға болады. Ол менің өз басымнан өткен оқиға. Бұл да жақсы шешім.
Жетіншіден, колледжге түсуге болады. Колледжде грант көп, қажетті мамандықтар бойынша колледж бітіргендер нарықта тапшы. Керек болса, біраздан кейін әрі қарай ЖООға түсіп, қысқа мерзімде жоғары білім алып шығуға да болады.
Көріп отырғандарыңыздай мүмкіндіктер өте көп. Бәрі әлі алда. Толық мәлімет алу үшін университеттердің қабылдау комиссиясына жолығу керек», – деп жазды Асхат Аймағамбетов әлеуметтік желідегі парақшасында.