Шымкентте әскери бөлімде борышын өтеп жүрген сарбаз жындыханадан бір-ақ шықты деп хабарлайды КТК телеарнасы. 35748 артиллерия дивизионының жауынгері Самрат Тыныштықбай осыдан бес күн бұрын ғана сау болған дейді туыстары.
Бірақ соңғы екі-үш күнде есінен адасып, аяқ асты өзгеріп кеткен. 20 жастағы жауынгердің туыстары бұл әскери бөлімдегі әлімжеттіктің кесірі болуы мүмкін деп күдіктенеді. Осыдан бес күн бұрын ғана ауылдан анасы мен әжесі келгенде ұлы сау болған екен. Арада бірер күн өткен соң Самрат психикалық ауытқуы бар науқастарға арналған ауруханадан бір-ақ шыққан.
«Күдігіміз бар, ұрған болуы керек. Әйтпесе екі күнде ол бүйтіп жынды адам құсап қалмайды ғой. Жынды адам сияқты боп қалған. Оны қорқытыпүркітіп, ұрып-соғып, соны білдірмейтін қылған. Жаңа біреу «психотроп зат салып жіберуі де мүмкін» деді. Сап-сау баланы екі күннің ішінде әскери бөлім психауруханаға жатқызған. Не деген оңбаған адамдар?!», — дейді сарбаздың апасы Салтанат Тыныштықбай.
Ал әскери бөлімдегілер туыстарының күдігін жоққа шығарады. Күнделікті қызмет етіп, үлгілі сарбаз ретінде танылған Самрат таңғы сап түзеу кезінде түсініксіз әрекет істей бастады дейді. Тіпті қаруластарына әмір беріп, пәрмендерді тыңдауды қойған соң, медициналық ротаға жібердік деп ақталуда.
«Балаларға өзіненөзі басқа тұрып, үндемей сапта тұрады да, бірақ сөйлеп тұрады, бірдеңе деп. Мысалы, «сапқа тұрыңдар» деп айқайлайды», — дейді 35748 әскери бөлімі артиллерия дивизионының командирі Әділет Кенжебеков.
20 жастағы сарбазды кешелі бері тексеріп жатқан психикалық емдеу орталығының мамандары есінде кемістігі бар екені анық дейді. Бірақ нақты диагноз әлі қоя алмаймыз деп отыр. Ол үшін тағы он күн қажет. Самрат бұл мекемеде бір айдай жатады. Ал сап-сау ұлын есінен тандырған әскери бөлімдегілер екеніне сенімді жақындары әскери прокуратура айналысып, бейнекамераларды жіті зерттеуін талап етіп отыр.
