Қарағанды облысының Шет ауданы Ағадыр кентінде атыс болып, бір адам жарақат алды.
Атыс сәті түсірілген бейнежазбалар әлеуметтік желіде тарады. Видеодан қолына қару ұстаған ер адамдар көрінеді.
Қарағанды облысы полиция департаментінің баспасөз қызметі желіде тараған бейнежазбаға қатысты түсініктеме берді. Ведомство жанжалға қатысушылардың барлығы анықталғанын хабарлады. Оқиға салдарынан ер адам медициналық мекемеге аяғынан оқ жарақатымен түсті.
«31 Наурызда Ағадыр кентінің медициналық мекемесіне жергілікті тұрғын оқ жарақатымен жеткізілді. Полицияда кісі өлтіруге оқталу фактісі бойынша қылмыстық іс қозғалды. Оқиғаның барлық қатысушылары анықталды», - деп атап өтті департаменттің баспасөз қызметі.
Ведомство бұл қылмыстық істі тергеу полиция департаменті басшылығының бақылауында екенін айтты.
